عالية وامها بالمستشفى عم يعملوا تحاليل واشعة لامها مشان موضوع مرضها
نظرة الحزن ما عم تفارق عالية
.............
عالية بالليل عم تصلي وتسجد باكية وتدعي ربها بنجي امها
قيام الليل والدعاء بعد منتصف الليل صار شيء اساسي عند عالية كل يوم
..........
اليوم بدا تطلع نتيحة الأشعة والتحاليل طبعاً عالية ما نامت كل الليل وهي تدعي ربها وتصلي وتسجد لحتى رب العالمين ينجي امها ويبعد عنها هيك مرض
الله يبعدو عنا وعنكم وعن السامعين يارب
...............
بيصير وقت يروحو ع المشفى
عالية بتروح ع اوضة امها بتتأملا هي ونايمة وعيونا كلن دموع
ام عالية ببتقلب بتختا وبتفتح عينا بتلاقي عالية واقفة عند التخت وصفنانة وعيونا كلا دموع بتقوم فوراً
عالية بنتي شبكي يا عمري
عالية بترجع لوعيا وبتتصنع الضحكة
وبتفرك عينا ع اساس فات فيا شي.... مافي شي مامي بس مدري شو فات بعيني.... قومي يلا ماما
بتشدا من التخت بمزح
...................
عالية وامها بالمستشفى بمكتب الدكتوز ناطرينو يجي ويجيب معو النتيجة
قاعدين مقابيل بعض بوش المكتب تبع الدكتور وعم يطلعوا ببعض تطليعات فيها قلق وخوف وتوتر بس تنيناتن عم يخبو هالشي ويبتسمو لبعض يعني كل وحدة عم تخبي توترا جواتا
بيجي الدكتور بعد انتظار دام اكتر من نص ساعة
عالية دغري بتقوم ع حيلا وبتسال الدكتور... دكتور طمني الله يخليك كيف طلعت النتيحة مافيا شي ما اكيد مافيا شي باذن الله سليمة
مسكينة ملهوجة ولهيك حكت بسرعة وسالت كل هل اسئلة سوا وورا بعض حتى نفس ما اخدت
الدكتور بيقعد ورا مكتبو وبيحط الظرف يلي جايبو بأيدو ع المكتب وبيطلع بأم عالية وعالية وبعدين بيطخي راسو شوي وبيرجع بيرفعو وبيقول... للأسف النتيجة إيجابية يعني الورم موجود
الصدمة تعلو وجه عالية ودغري بتخبط ع المكتب بعنف وبنبرة تحدي بتقول للدكتور... لأ انا امي بدا تضل عايشة انا امي ما حتموت حتضلا معي حتضلا جمبي وتحميني حتضلا تربيني وتهتم فيني حتضلا تحطلي فطور الصبح وتفيئني ببوسة حنونة انا امي بدا تبقى جمبي بكل مراحل حياتي لانو من بعدا مارح يضل عندي حياة وبتبكي بقهر... الدكتور ساكت وعم يطلع على عالية وشفقان عليها وكتير متأثر
طبعاً ام عالية حضنت بنتا وصارت تهديا ويبكو سوا
.........................
ام عالية هي وعالية قاعدين بالبيت وساكتين والحزن مخيم ع اجواء البيت
بيرن تلفون عالية بس ما بترد ولا بتتحرك من محلا الهيئة ما سمعتو مسكينة مهمومة وصفنانة بهما
ام عالية انتبهت انو بنتا صفنانة
عالية ماما موبايلك امي
عالية ما بترد
يوه عالية عالية
انتبهت عالية انو امها عم تناديلا... اي اي ماما بَكي شي بدك شي حبيبتي
لا تؤبريني انا تمام بس موبايلك انفلق وهو يرن
بالله ما نتبهت يا امي
بتاخد الموبايل وبتشوف المكالمة الفائتة
بتتصل
بتنطر شوي وبعدين بتحكي
الو
اي حنان
كيفك حبيبتي
وعليكم السلام والإكرام
يا هلا حبيبتي
آاااااا اي صح اليوم الخميس والله نسيت لا تواخذيني
لا والله مافي شي آخد عقلي
لا مبلا اكيد بدي روح
اي خلص منتقابل هنيك
وعليكم السلام
الله معك
بتسكر الموبايل
ام عالية بتطلع بعالية... اي ماما شبكي في شي شبها حنان
مبها شي ماما بس عم تذكرني انو اليوم الخميس وفي عنا درس دين بالجامع
ايواااااا اي تؤبريني روحي الله يرضى على اسمك ويسعدك
بس ماما بركي احتجتي شي مالي حابة اتركك ساعتين كاملين لحالك
الله يصلحك يا بنتي شو بنت صغيرة انا بعدين ليش حاطة ببالك انو فيني شي او حيصرلي شي بغيابك
لاااااا بعيد الشر عنك ياروحي انتي... بتقرب عليها وبتركع وبتبوس ايديها التنتين... لك انتي امل حياتي وست الكل الله يخليلي ياكي يارب... بيدمعو عيونا وبنتبه امها مع انها حاولت تداري عيونا عن امها
عالية ماما قومي البسي وروحي بلا ما تتأخري الله يرضى عليكي ولا تنسى تدعيلي
ماما انا ما عم بعمل شي بحياتي غير اني عم بدعيلك ليل نهار بقلبي وبدون ما تسمعيني
تؤبريني وبتبوسا
.............................
بيمر وقت وعالية ورفيقتا حنان طالعين من الدرس
حنان بتسأل عالية
لك انتي شو قصتك اليوم حسيتك مو ع بعضك كنتي عم تبكي كل الوقت وحسيتك مو معنا بالمرة خير حبيبتي امانة احكيلي والله انشغل بالي عليكي
بغصة وهي عم تمسح دمعتا... الله لا يشغلك بال يارب
طيب احكي بترتاحي عالية الا اذا بتعتبريني غريبة عنك
لا لا شو هالحكي بالعكس صدقيني بعتبرك اكتر من اخت لألي
اي لكان احكي يلا
طيب فينا نروح نقعد بمكان ونحكي ع رواق لانو مابدي ضل واقفة بالشارع
اي يلا امشي
........................
بيروحو بيقعدو بكافيه هادية
يبدو انو عالية حكت لحنان عن مرض امها وحنان زعلت كتير بس صارت تقوي عالية
حبيبتي انتي انسانة مؤمنة وصادقة مع ربك لازم تكوني اقوى من هيك ولازم ثقتك بالله ما تهتز ابداً وتكوني قد المسؤولية هادا امتحان من رب العالمين ونشالله ربي رح يشفيلك ياها يارب بس ما عليكي الا بالدعاء والصلاة
عالية ودموعا على عرض خدودا وبغصة وهي عم تمسح الدموع..... ونعم بالله
حنان كأنو اتذكرت شي مهم.... لك صحي اتذكرت شغلة لحظة لاعمل تلفون بتطالع موبايلا من الشنتاية وبتتصل وهي ماسكة ايد عالية
بستنا شوي وبعدين بتحكي
السلام عليكم
.َ.....................
عالية عم تفتح باب البيت وتفوت دغري بتبلش تنادي على امها وتدور عليها بالبيت كلو
ماما مامااااااااااا
بس امها ما بتجاوب
عالية بتموت من رعبتا وبتركض ع اوضة امها وبتفتح الباب بسرعة بتلاقي امها ساجدة وعم تدعي وتبكي
بتتنهد وبتقعد ع طرف التخت المسكينة انقصفو ركبا من الرعبة ليكون امها صرلا شي
بتخلص ام عالية وبتمسح دمعتا بغطا الصلاة مشان ما تشوفا عالية مفكرتا ما شافتا وحست عليها
اي تؤبريني شبكي ليش كنتي عم تعيطي وتناديلي هيك
ماما البسي وتعي معي فوراً
لوين بدي اجي معك
يلا قومي لا تسألي بتشدا من ايدا وبتروح ع خزانة امها.. انو مانطو بدك يلا ماما بسرعة ما عنا وقت
لك شوفي يا بنت فهميني
بس نروح بفهمك يلا ماماااااا
اي اي طيب
بتروح ع خزانتا وبتطالع تياب وبتلبس
.............
عالية وامها طلعو من البناية وركبو تكسي
بيوصلو ع مشفى وبينزلو من التكسي
وهنن فايتين ام عالية بتوقف.... لك بنتي ليش جبتيني لهون
ماما هلأ تعي فوتي بعدين بشرحلك
لا مالي فايتة لأعرف
ماما جايين لعند حدا عندو الحل بإذن الله
حل لشو
لحالتك ماما حل لشفاكي بإذن الواحد أحد
بتاخدا من ايدا وبيفوتو وام عالية بعدا مستغربة
...........
يتبع
