وعبر نصر الله عن اعتذاره عبر حسابه الشخصي على موقع التواصل الاجتماعي Facebook، ليؤكد من خلاله تقديره للفنانة نهى العمروسي ولفنها.
وكتب يسري نصر الله: "بعض الأصدقاء وجهوا إلي اللوم لذكري إسم الفنانة الكبيرة نهى العمروسي في إطار حديثي عن الأستاذ يوسف شاهين وحرصه على نقل معرفته للمحيطين به من الشباب، لأن كلامي عن ١١ إعادة للقطة، ممكن يسيء ليها".
وتابع: "معاهم حق على الأرجح، نهى كانت شابة صغيرة أيام (حدوتة مصرية) و بتخوض أول تجربة ليها كممثلة، وأنا كنت باخوض أول تمرين ليا كمساعد إخراج تحت التمرين، شاهين كان بيدير نهى في مشهد صعب والإنفعال المطلوب منها كان عالي جدا، كان بعد كل إعادة يبصلي ويسألني رأيي، وأنا كان إحساسي إن نهى تقدر تعمل أحسن".
وأضاف: "الأستاذ بعد عدد من الإعادات شخط فيا وقاللي إن كل ممثل ليه حدود، فهزيت كتافي وقلت إني مش فاهم، بعديها بأسبوع نادى عليا وخلاني أحضر لقطة لنور الشريف وبعد عدد من الإعادات قاللي: شفت. حتى نور ليه حدود، حقيقة لا أياميها فهمت ده، ولا النهاردة فاهم ده. ولا حابب كلمة "حدود" دي. وح اشرح ده بعدين".
وتابع: " الحدود أياميها كانت مرتبطة قبل أي شيء بميزانية الأفلام. يعني كل إعادة للقطة معناها إنك بتحرق فيلم خام. وانت حاطط لنفسك عدد محدود من علب الخام ( العلبة ٣ دقايق، ومخرج زي الأستاذ كان معدل استهلاكه للخام حوالي ١٨٠ علبة يعني معدل ١ ل ٥ تقريبا)، وأياميها كان المخرج "الشاطر" هو إللي بيوفر خام".
وأضاف: "النهاردة ما بقاش حد يتكلم عن الخام، لإننا بنصور ديجيتال (بس طبعا موضوع الميزانية مش بس خام، عندنا طبعا زمن محدود لازم برنامج التصوير يخلص فيه).فيه ممثلين الإعادات الأولى بتاعتهم بتبقى أحسن ( بيوصلوا للأحساس المقنع بسرعة، والإعادات بتخليهم يتكلوا على التكنيك أكتر من إتكالهم على الإحساس)".
"وفيه ممثلين تانين بتحتاج تعيد معاهم كتير لحد ما يتخلصوا من عكاز التكنيك وما يعتمدوش غير على الإحساس، ويتعاملوا مع مكان التصوير واللمبات على إنه مكانهم والنور الطبيعي بتاع المكان، وينسوا الكاميرا والكم المهول من الفنيين إللي واقفين وراها. ده مش عيب على فكرة. العيب الكبير هو لما يبقى المخرج حاسس إنه ممكن يوصل مع الممثل للأبعد، وما يعملش ده لأنه قلقان من الإنتاج، أو لأنه زهقان، أو خايف".
واختتم يسري نصر الله وجهة نظره بكتابة: " ليه أنا ما باحبش فكرة حدود الممثل؟ ده موضوع تاني خالص، بس عايز أقول لنهى: ما تزعليش مني".